Kisurnar sem skildar voru eftir fyrir utan Kattholt aðfararnótt laugardagsins 21.apríl, reyndust hafa verið teknar án vissu eigandans.
Ekið var með kisurnar utan af landi að Kattholti. Læðan gaut 5 kettlingum kl. 12 á hádegi á laugardeginum og heilsast móður og börnum vel. Eigandinn er algjörlega miður sín, en fær kisurnar aftur með því skilyrði að hann láti gelda högnann og gera ófrjósemisaðgerð á læðunni þegar það má.
Kattavinafélagið er í sambandi við dýraspítalann á svæðinu sem kisurnar búa á og verður fylgst með því að eftir loforðum eiganda verði fylgt eftir. Enn og aftur biðjum við kattaeigendur að gelda högna og láta gera ófrjósemisaðgerðir á læðum.