Gagnlegar upplýsingar

Í nýjum lögum um velferð dýra segir:

8. gr. Tilkynningarskylda.
Leiki grunur á að meðferð á dýrum brjóti gegn lögum þessum eða reglugerðum settum samkvæmt þeim skal sá sem verður þess var tilkynna það Matvælastofnun eða lögreglu svo fljótt sem auðið er. Sé mál tilkynnt lögreglu skal hún tilkynna Matvælastofnun um það. Matvælastofnun skal kanna hvort tilkynning sé á rökum reist.
Tilkynnandi skv. 1. mgr. getur óskað eftir því að nafni hans verði haldið leyndu gagnvart öðrum en Matvælastofnun eða lögreglu. Ef líklegt má telja að hagsmunir viðkomandi skaðist ef greint er frá nafni hans skal fallast á ósk um nafnleynd. Ef ekki eru forsendur til þess að fallast á nafnleynd er tilkynnanda heimilt að draga tilkynningu sína til baka. Ákvörðun Matvælastofnunar um nafnleynd er heimilt að skjóta til ráðherra innan tveggja vikna frá tilkynningu ákvörðunar. Leiðbeina skal tilkynnanda um rétt hans til að kæra ákvörðun Matvælastofnunar.

9. gr. Tilkynningarskylda þeirra sem hafa afskipti af dýrum.
Hverjum þeim sem stöðu sinnar og starfa vegna hefur afskipti af málum dýra og verður var við aðstæður eins og lýst er í 1. mgr. 8. gr. er skylt að tilkynna það Matvælastofnun.
Sérstaklega er dýralæknum og heilbrigðisstarfsmönnum dýra skylt að fylgjast með meðferð dýra, aðbúnaði dýra, aðgerðum og meðhöndlun dýra, dýrahaldi, aðferðum við dýrahald og útbúnaði dýra eftir því sem við verður komið og gera Matvælastofnun viðvart ef ætla má að aðstæður dýrs séu með þeim hætti sem lýst er í 1. mgr. 8. gr.
Tilkynningarskylda samkvæmt þessari grein gengur framar ákvæðum laga eða siðareglna um þagnarskyldu viðkomandi starfsstétta.

10. gr. Geta, hæfni og ábyrgð.
Hver sá sem hefur dýr í umsjá sinni skal búa yfir eða afla sér grunnþekkingar á þörfum og umönnun viðkomandi dýrategundar og skal enn fremur búa yfir nægjanlegri getu til að annast dýrið í samræmi við lög þessi.

Lög um velferð dýra.

Þann 1. janúar sl. tóku gildi ný lög um velferð dýra. Kattaeigendum er nú skylt að einstaklingsmerkja kettina sína (22. gr. laga um velferð dýra). Kettir sem eru ekki merktir í samræmi við 22. gr. og ganga lausir eru skilgreindir sem hálfvilltir.

Eftir tvo sólarhringa frá handsömun er sveitarfélagi heimilt að ráðstafa hálfvilltu dýri til nýs eiganda, selja það gegn áföllnum kostnaði eða aflífa án bóta (24. gr.).

Mikilvægt er að hafa einnig ólar og merkispjöld á útiköttum. Slík merking er þó ekki nægileg og ómerkt dýr (hvorki ör-né eyrnamerkt) er skilgreint sem hálfvillt. Það hefur því aldrei verið jafn mikilvægt og nú að örmerkja!

Ekki nægir að örmerkja dýrin svo þau komist fljótt til skila ef þau týnast. Einnig er nauðsynlegt að skrá dýrið í miðlægan gagnagrunn, dyraaudkenni.is. Að örmerkja dýr en skrá það ekki í gagnagrunninn veitir ekki fullkomið öryggi á að dýrið komist til skila. Með því að hafa dýrið skráð ætti það að komast fljótt aftur til síns heima. Skrásetning í gagnagrunninn er ódýr og fer fram hjá dýralækni.

Við hvetjum kattaeigendur sem eiga eftir að örmerkja og skrá kettina að huga að því sem fyrst.

Ný lög um velferð dýra: http://www.althingi.is/lagas/141b/2013055.html

Eitt af því mikilvægasta sem þú getur gert fyrir köttinn þinn, aðra
ketti og samfélagið er að gelda læðuna þína eða fressinn. Á Íslandi er
fjöldi katta og kettlinga í leit að nýjum heimilum, en ólíklegt er að
þau fái öll heimili. Kettirnir eru miklu fleiri en heimilin sem standa
til boða. Ein leið til að fækka heimilislausum dýrum er að draga úr
óskipulögðum gotum með ófrjósemisaðgerðum á læðum og fressum. Kettir ná
fljótt kynþroska (alveg niður í fjögurra mánaða) og þeir geta fjölgað
sér með hvaða frjóum ketti sem er af hinu kyninu.
Gelding/ófrjósemisaðgerð hefur líka marga heilsufarslega kosti í för með
sér og gerir sambúð manns og kattar betri.

 Staðreyndir um ógelda fressketti

• Hann
  hverfur gjarnan í marga daga í senn í leit að breimandi læðu. Þetta
  eykur líkurnar á því að hann verði fyrir bíl eða týnist.
• Óðal
  ógeldra fressa er iðulega mun stærra en geldra og eyða þeir miklum tíma í
  að fara um það. Jafnframt verja þeir svæðið sitt af mikilli hörku
  gagnvart öðrum köttum. Þeir slasast iðulega við þessi átök.
• Högnar merkja óðöl sín oft með hlandi sem er afar lyktarsterkt.
• Hann
  veldur því að fjöldi læða verður kettlingafullar og gjóta kettlingum
  sem verða mögulega svæfðir vegna þess að ekki finnast heimili fyrir þá.

Gelding
hefur hvorki áhrif á skapgerð né hegðun fresskattarins gagnvart
eigendanum. Við geldingu verða þó þær breytingar að fresskettir verða
ekki eins uppteknir af því að verja svæði sín eins og ógeltir kettir.
Þeir verða einnig heimakærari og lifa oft lengra og áhyggjulausara lífi
þar sem þeir þurfa ekki að berjast sífellt fyrir lífi sínu. Gelding á
fressköttum er einföld aðgerð þar sem eistun eru fjarlægð. Kötturinn fær
að fara heim samdægurs. Best er að gera verðsamanburð á dýralæknstofum
og eru stundum tilboð í gangi.

• Hún getur orðið kettlingafull 4-5 mánaða.

• Hún getur
  borið ábyrgð á 20.000 afkomendum á aðeins fimm árum! Þá er ekki aðeins
  talað um hennar kettlinga, heldur kettlingana sem hennar afkvæmi eiga
  o.s.v.

• Það er útbreiddur misskilningur að læður þurfi að eiga
  kettlinga einu sinni áður en þær eru teknar úr sambandi. Læðan mun ekki
  sakna þess að hafa aldrei eignast kettlinga.

• Læðan getur átt
  kettlinga tvisvar til þrisvar á ári og er þetta ákaflega mikið álag á
  hana. Læða getur orðið kettlingafull 10 dögum eftir got.

• Læðan verður fljótt kettlingafull ef hún fær að ganga laus úti. Þrátt fyrir að
  vera inniköttur þá dregur hún ógelda fressketti að heimilinu þegar hún
  breimar. Þá er möguleiki á að hún sleppi úti eða fressköttur inn. 

Er kötturinn þinn örmerktur? Til þess að auka líkurnar á að týndur köttur komist heim er mikilvægt að hann sé örmerktur. Örmerki, sem er á stærð við hrísgrjón, er skotið undir húð á milli herðablaða kattarins. Einnig er mikilvægt að útikettir jafnt sem innikettir séu með merkta ól með upplýsingum um heimilisfang og símanúmer eiganda. Ólar geta dottið af, því þarf líka að örmerkja kettina.

Þegar örmerktur köttur fær nýjan eiganda er mikilvægt að breyta skráningu á örmerki. Í flestum tilfellum er það fyrri eigandi sem þarf að láta breyta skráningunni. Þetta er mikilvægt atriði svo hægt sé að ná sambandi við réttan aðila. Dýraauðkenni.is er miðlægur gagnagrunnur og geymir örmerkingu og eyrnamerkingu dýra. Skrásetning er ódýr og fer fram hjá dýralækni.

Týnist kötturinn þinn er gagnlegt að fylgja eftirfarandi sex þrepum:

1) Er hann inni?

Hljómar kjánalega, en í mörgum tilfellum þegar kettir hverfa, finnast þeir heima hjá sér. Kettir eru forvitnir og geta átt það til að troða sér á ólíklegustu staði. Athugaðu alla þá staði þar sem hann gæti hafa lokast inni.

2) Kannaðu umhverfi þitt

Leitaðu í bílskúrnum þínum, geymslu og garði.

3) Talaðu við nágrannanna

Gakktu um hverfið og láttu nágrannanna vita að kötturinn þinn sé týndur. Biddu þá um að gá í geymslu, bílskúr og garð. Gagnlegt er að prenta út auglýsingu með mynd af kettinum og helstu upplýsingum um hann, svo sem lit á feldi, merkingu (örmerki og/eða ól), hvaðan og hvenær hann týndist og símanúmer eiganda.

4) Hafðu samband við Kattholt og dýralæknastofur

Þú getur sent tölvupóst á kattholt@kattholt.is með helstu upplýsingum og mynd af kettinum. Þá er hægt að birta auglýsingu undir „týndar- og fundnar kisur” á heimasíðunni, kattholt.is.

Á heimasíðunni eru myndir af öllum þeim köttum sem koma í Kattholt. Upplýsingarnar um kettina eru settar inn samdægurs. Í Kattholti er skanni sem les örmerki. Þegar óskilaköttur kemur í Kattholt er strax athugað hvort hann sé ör- og/eða eyrnamerktur. Til að auðvelda leit að eiganda er gagnlegt að kötturinn sé skráður á dyraaudkenni.is sem er miðlægur gagnagrunnur og geymir örmerkingu og eyrnamerkingu dýra. Skrásetning er ódýr og fer fram hjá dýralækni.

Hafðu samband við dýralæknastofur í þínu nágrenni til að spyrjast fyrir um köttinn þinn, hvort hann hafi mögulega komið slasaður eða dáinn.

5) Auglýstu eftir kettinum þínum á netinu

Hægt er að senda Dýrahjálp auglýsingu til að birta á heimasíðunni þeirra. Kattholt er á Facebook. Auglýstu líka á kattartengdum síðum á Facebook eins og „Kattavaktin” og „Týnd/Fundin dýr”. Dýraeigendur á Akureyri geta auglýst á Facebook síðu Kisukots.

6) Auglýstu í hverfisverslunum

Settu upp auglýsingar í hverfisverslunum. Hafir þú nýlega flutt er gott að setja upp auglýsingar í gamla hverfinu ef ske kynni að kötturinn leiti aftur þangað.

Við viljum minna kattaeigendur á mikilvægi þess að örmerkja og/eða eyrnamerkja dýrin. Einnig er mjög gagnlegt að setja á þau merkta ól.

Munið að gelda eða taka kettina úr sambandi, því ógeld dýr eru líklegri til að fara á flakk og týnast.

Heimild: Watson, Rebecca (2010). The cat expert.

Dýraauðkenni.is er miðlægur gagnagrunnur sem geymir ör- og eyrnamerkingu dýra. Skrásetning er ódýr og fer fram hjá dýralækni. Dýrauðkenni kemur að góðum notum hvort sem dýrið þitt týnist eða þú finnur týnt dýr. Ef dýrið er örmerkt og skráð í miðlægan gagnagrunn kemst það yfirleitt fljótt til skila. Þegar óskilaköttur kemur í Kattholt kanna starfsmenn hvort dýrið sé ör- og/eða eyrnamerkt. Sé dýrið merkt skrá þeir númerið á merkingunni inn í gagnagrunninn. Þá koma upp helstu upplýsingar um viðkomandi dýr og hvernig hægt er að ná í eiganda þess. Sé dýrið örmerkt en ekki skráð í Dýraauðkenni getur verið flóknara að hafa upp á eiganda, því hafa þarf samband við dýralæknastofur til að komast að því hvar dýrið er skráð. Finnist eyrnamerkt dýr getur finnandi skráð inn númerið á merkingunni í gagnagrunninn og fundið upplýsingar um eiganda. Dýrið kemst þá fljótt til skila. Nánari upplýsingar um Dýraauðkenni eru á heimasíðunni dýraauðkenni.is.

Dýraauðkenni.is er miðlægur gagnagrunnur sem geymir ör- og eyrnamerkingu dýra. Skrásetning er ódýr og fer fram hjá dýralækni. Dýrauðkenni kemur að góðum notum hvort sem dýrið þitt týnist eða þú finnur týnt dýr. Ef dýrið er örmerkt og skráð í miðlægan gagnagrunn kemst það yfirleitt fljótt til skila. Þegar óskilaköttur kemur í Kattholt kanna starfsmenn hvort dýrið sé ör- og/eða eyrnamerkt. Sé dýrið merkt skrá þeir númerið á merkingunni inn í gagnagrunninn. Þá koma upp helstu upplýsingar um viðkomandi dýr og hvernig hægt er að ná í eiganda þess. Sé dýrið örmerkt en ekki skráð í Dýraauðkenni getur verið flóknara að hafa upp á eiganda, því hafa þarf samband við dýralæknastofur til að komast að því hvar dýrið er skráð. Finnist eyrnamerkt dýr getur finnandi skráð inn númerið á merkingunni í gagnagrunninn og fundið upplýsingar um eiganda. Dýrið kemst þá fljótt til skila. Nánari upplýsingar um Dýraauðkenni eru á heimasíðunni dýraauðkenni.is.

Kisur í heimilisleit eru sýndar eftir hádegi á virkum dögum á fyrirfram bókuðum tíma. Bókun fer fram símleiðis milli kl. 9-12 á virkum dögum í síma 567-2909 eða í gegnum tölvupóst á kattholt@kattholt.is.

Vinsamlegast athugið að kisurnar eru aðeins sýndar þeim sem ætla að taka að sér kisu á heimili.

Þegar köttur fer á nýtt heimili frá Kattholti þá greiðir nýr eigandi fyrir ófrjósemisaðgerð,
ormahreinsun, örmerkingu og skráningu og 1. bólusetningu, samtals kr. 24.500-.

Kettir í heimilisleit eru auglýstir undir kisurnar> kisur í heimilisleit á
heimasíðu. Dýraspítalinn í Víðidal sér um dýralæknaþjónustu fyrir Kattholt.